Manipur nung mapa mongui alitem nem teyari agütsü

Imphal, Tsüklai 26 (Agencies): Chief minister Nongthombam Biren Sing-i Amongnü ashiba agi, par teloki sorkar kümteter küm ka ajungba benjungmung nüngtem nung Yangtepnü nungi tenzüka Metsüremi (March) 15 tashi nung project 100 shi amenoktsü.
Iba benjung nung adentsüba atema Union home minister Rajnath Singh Metsüremi 14 nü state arua atongtsü, ta pai ashiba den BJP national tir Amit Shah-a iba sentong nung adentsü akok ta shisem.
Amongnü chief minister-i nisung 179 aser Manipur State Co-operative Bank (MSCB) Ltd. kübok self-help group tem nem chief minister secretariat, Durbar Hall nung sentong ka agia loan agüja liasü.
Iba sentong nung Meeyamgi Numit aser Hill Leaders’ Day nung chief minister dang teyari meshirtem nem sen ajak agi 1,38,34,000 lemtsüogo.
Iba anogo ana sentong nung nüburtem den sensaksemba mapang osang bendenba dak ajemdaker sorkari tekübokba jenjang nung aliba nisungtem aika nem teyari agütsüogo.
Chief minister-i ashiba agi, nisung aikati pa dang teyari meshiogo aser parnok nem loan ama sen teyari agütsüogo. Ak metsütsüba atema loan nisung 56 nem aser dairy loan aluyimer kibong trok nem agütsüogo. Maneni SHG 65 nem sen 37,95,000 agütsüogo aser iba ajanga kibong 725 ajangzüktsü.
Biren Singh-i ashiba agi, loan lemtsüba sentong ya state nung nüburtem pei sasa ayanga chiyongtsüba atema ajungshitsü asoshi ayongzükba lir. Pai bank nung ketdangser aser staff temi sorkar nükjidong ajangtettsü asoshi teyaritep nung inyakba atema parnok tenüng asang.
Biren Singh-i loan agizüker rongnung international jenjang nung nüngtugu designer Robert Naorem densema aliba tepela lemsatepa liasü.
Maneni iba sentong nung Khurai MLA L. Susindro aser MSCB Ltd managing director A. Subhash Singh nunger densema liasü.