Manipur nung mejangjatetba tashidak ka ajanga shirangteper

Imphal, February 2 (Agencies) : Manipur kübok Thoubal district nung tashitak tasen ka ajanga nisung 22 shiranga mozüki balala nung anepaludar, aser tanü medical team ka tesem tonga yokogo, ta ketdangsertemi metetdaktsü.
Tesüiba anogo ananü Thoubal district kübok yimtsüng asem nung alirtem teratatsü aketba tashidak ka ajanga shiranger aser medical team-i shirangertem dak nungi samples bendena tendangtsü, ta J.N. Institute of Medical Sciences director, Devendra Laishram-i ashi.
Mongulbarnep nisung pezü iba tashidak agi shirangba yimya ajiteta Regional Institute of Medical Sciences (RIMS) nung anepalutsü aniok. Ano shiranger kar Imphal nung nija mozüki balala nung anioka anepaludar ta osang angazüker.
“Mejangjatetba tashidak agi shiranger nisung 22 tashi mozükitem nung anepalur. Ajisüaka, parnok rongnung nisung anabo temang tajungba akümba agi mozükidang nungi anizükogo” ta RIMS medical superintendent, Maisnam Amuba-i osangbener dang ashi.
Shirangertem temang tajungba lir aser kanga süoki ia bilemtsüsa tensa masü, anungji kinüngertem süngjema atatsü mepishir, ta Amuba-isa ashi.
Shirangertem dak nungi samples bendena tendangba sülen ang tashidak metettsü. Taküm January 4 nü menoknok agi kongshiba tesemtem nung aliba tube wells mesüra handpumps nungi adokba tzü ajemba ajanga nisungtem shiranger asütsü akok, ta Amuba-isa metetdaktsü.
Ajisüaka, shirangertem karibo tzü ajanga tashidakji adokba masü ta ashir.
“Onok küm aika iba tzü jemyonga arur kechiyong ozü yimdak ‘piped water’ mali. Tesüiba mapang onok kodanga iba tashidak agi meshirangdang” ta shiranger kati osangbener dang ashi.
Osang angazükba agi, ketdangsertemi Imphal nung shirangertem anepalutsü atema mapa inyakdar aser külen state sorkaria health ketdangsertem dang shiranger nem mozü angati agüja anepalutsü tetuyuba agütsüogo.
Iba tashidak ano mejangjatetba agi Manipur sorkari public nem tetuyuba kecha magütsüi lir, ta health department ketdangser kati metetdaktsü.