Manipur nung mezüngbuba film city Ukhrul nung amenoktsü

Imphal, Tsüklai/February 6 (Agencies): Manipur sorkari, state nung mezüngbuba film city, Ukhrul district kübok Ringui yimtsüng nung amenoktsü renema lir. Iba project asoshi nüngshilong Mongolbarnü azüngtsüogo.
Ringui yimtsüng ya Imphaal nungi Km 50 shi pila tenem lima nung lir, kong Tangkhul Naga nungertem timba lir. Art and culture minister L Jayantakumar Singh-i ashiba agi, Manipur State Film & Television Institute director Nilotpal Majumdar lenisüba kübok minister team kati Ringui semdanga film city amenoktsü asoshi tesem shimogo.
Par department-i iba tesem terenlok asoshi budget lemzüktsüogo, ta shia minister-i, yimtsüng nung tekolakba aser ali kiburtem den sensak asemba sülen iba project asoshi ali shima liasü, ta ashi. Jayantakumar-isa, iba mapa asoshi pei ali tenla agütsürtem nem tenüngdakba teyari agütsütsü, ta ashi.
Film yangluba tsütsü Manipur kanga nüngtugu küma odar aser taoba küm ishika tsüngda state nungi film yanglurtemi national aser international jenjang nung naroküm aika agizüka arudar.
Aribam Syam Sharma indang nüngtugu feature film Imagi Ningthem (My son, my precious) ya India nunger movie tem rongnung Nantes International Film Festival, 1982 nung tetushi Grand Prix agizükba mezüngbuba film lir.
Ano Sharma indang film sa Olangthagee Wangbadasoo (1979)-i Manipur nung Sholay indang record raksaja Manipur nung hopta 30 tashi sayua liasü.