Manipur nung minister temi Ibobi amokmerener

Imphal, April 01 (Agencies): Manipur nung minister temi Chief Minister, Okram Ibobi Singh dang mulung masürtem peladaktsütsü atema pai minister ka danga anentsüra parnok ajak anentsü metetdaktsüogo, ta Hokolbarnü minister kati ashi.
Minister tem senden ka amenba sülen iba telemtetbaji parnoki chief minister nem metetdaktsü.
“Minister ka anentsüra, onok ajak anentsü,” ta minister kati ashi.
Congress legislature party nung mulung masüba MLA tem takhangba ajanga tang chief minister tiyongtsü nung kanga mejepdar.
Assembly menden 60 aliba state nung chief minister densema minister 12 dang melar.
Hokolbarnü Ibobi Singh New Delhi-ia oa anentsütsü shimba minister tem tenüng agütsütsü sentong liasü, ajisüaka Brihostibar aonung nisungtemi iba timtem metetba sülen pa New Delhi-i aotsü aliba sentongji thinen.
Osangbener den jembidang minister kati, mulung masürtemi akhangbaji kuli maka, parnoki junga meinyaker minister tem anendaktsüner, ta ashi.
Ajisüaka minister temi ashiba agi, minister kar dang anentsüra ibaji ajanga anentsüba minister temji ochimashi mapa nung densema lir mesüra mapa majetertem asütsü ta bilemtsü, aser ibaji ajanga taruba election nung parnok jenjang majungtsü.
Ano külen mulung masüba lenirtemi minister 12 nungi minister 11 anentsüla ta maneni akhanger. Parnoki Speaker, T. Lokeswora-a anendaktsüner.
Chief minister dak alia minister ajak anentsütsü akhangba ya Manipur yimtenren otsü nung tang mezüng ataloker.
Tamalen Ibobi Singh-i, küm ana ser tesadang nung minister tem ji melentsü ta jembia liasü, ajisüaka pai jembiba ama meinyakba ajanga tang iba timtem adoker.