Manipur nung mokdang malitsü atema inyaktsü: Heptulla

Imphal, March 22 (Agencies): Mokdang aser nokdang maliba state ka akümtsü atema Manipur sorkari tajungtiba agi meranga inyaktsü, ta tanü Manipur Angh, Najma Heptulla-i metetdaktsü.
11buba Manipur assembly mezüngbuba senden nung jembidang Heptulla-i, “State sorkari nüburtem ajangzüktsü atema mapatongtem inyaktsü,” ta ashi.
Tzüzüng-ozüng dak sentakba nung Anghi, tan ita state assembly election tesünep nung agitettsüsa police-i parnok shilem temulung süa inyakogo, ta ashi.
Laisa, “Nübo peria meliaka aser infrastructure den timtem aika liaka Manipur police-i telungpurtem anema takok ngua inyakogo,” ta ashi.
“Tang ama tensa junga azüoktettsü atema police force nem specialised skills agütsütsü atema ozü sorkari inyaktsü,” ta laisa metetdaktsü.
“Union sorkar indang ‘Act East Policy’ nungi tajangzük balala agia tesem nung terenlok kanga aliba state rongnung Manipur adentsü asoshi sorkari meranga inyaktsü, koba ajanga Manipur ya tesünep aliba tesem ka aser ajak tesünep nung litetba azükaru state ka akümtsü,” ta Heptulla-isa shisem.
“Tesem nung air connectivity atema Manipur sorkar aser Civil Aviation Union Ministry na tsüngda helicopter service tenzüktsü asoshi tezüngzüktep ka agiogo,” ta laisa metetdaktsü.