Manipur nung Naga Agreement atema lungkak ait ; CM Biren Singh-i Manipur litsü kümzüka ayutsü nangzük

Imphal, March 26 (Agencies) : Honibar anepdang nikondang 6:00 ako nungi Manipur Muslim Welfare Association (MMWA)-i Naga Framework Agreement indang osang tejangja agüjang ta takhangba agüja gondha 24 lungkak aitba sentong tenzük.
BJP-i aniba sorkari gondha 24 tsüngda NSCN(IM) aser Centre tsüngda Framework Agreement agiba indang osang tejangja ka metetdakjang, ta Association president Abdullah Pathan-i takhangba agütsü.
Tawa Nagaland nung NSCN(IM) general secretary Th Muivah-i Camp Hebron nung jembidang, “küm ana tejaklen agiba Framework Agreement nung Naga nunger aliba tesem ajak kongshitsü takhangba dena lir,” ta metetdaktsüba sülen MMWA-i iba onük atema lungkak aittsü tenzük.
Manipur nung Council of ministers nung Naga Peoples Front (NPF) MLA ka aniokba indang miim tasa state sorkari metetdaktsütsüla. NPF-i Manipuri nunger ta agizüktsü memulungbaji magizüker, ta Pathan-isa ashi.
Ano, Deobarnü Manipur Chief Minister N. Biren Singh-i state litsü kümzüka ayutsü ta metetdaktsüogo.
“Iba ya kü taküm nungia sentiba lir” ta tanü pa Delhi-i apusoa aodang ashi.
MLA Asabuddin nem Parliamentary Secretary jenjang agütsüba atema Biren-isa ashiba agi, “Nübortemi pa shimtet aser pa India senso ka lir, anungji ni kecha mesütet.”
“Prime Minister Narendra Modi dang nungi terenlok atema senotsü aika meshitsü atema ni Delhi-i aoer” ta paisa osangbener dang ashi.
Modi aser Home Minister Rajnath Singh nati August 3, 2016 nü Centre-i NSCN-IM den ‘framework agreement’ agiba indang osang tejangja metetdakjaka, March 21 nü NSCN-IM lennir Thuingaleng Muivah-i iba tenangzüktep nung Naga nunger litsü ajak dena lir ta kuli agütsü.
NSCN-IM ya 1988 küm asür Isak Chishi Swu aser Thuingaleng Muivah nati anir tenzükba telok ka lir aser parnoki Assam, Manipur aser Arunachal Pradesh nung Naga nunger lushi ajak Nagaland nung zükloktsü atema takhangba agütsür.
Iba asoshi Biren-i ashiba agi, “Home Ministry-i iba onük atema osang tejangja metetdaktsüogo, anungji asenok marentaktsüla. Muivah-i lir ta kuli agütsü saka ibaji Centre-i malia ta jangjashitsüogo.”
Manipur indang litsü kümzüka ayutsü aser iba asoshi nisung shingaia tsübua mebilemtsüla, ta paisa shisem.
Manipur assembly nung Asabuddin nem Parliamentary Secretary jenjang agütsüba anema Deobarnü Democratic Students’ Alliance of Manipur (DESAM)-i gondha 17 mokdangtsü ayongzük aser iba ajanga timtem ajurua liasü.
Iba onük atema Chief Minister, Biren-i, “Asabuddin ji India senso ka lir aser pa temzüngi melaba nübortemi shim. Pa MLA makümdang, anaben tashi pradhan ama shimogo” ta ashi.

Nagaland state tuluba makümtsü: Centre
New Delhi, March 26 (Agencies) : Nagaland state ulushitsü ta jembibaji aibelena jembiba onük ka lir ta Honibarnü Centre-i osang metetdaktsüogo.
India sorkari Nagaland state den anasa aliba state tem nungi lushitem agiteta Nagaland state ulushitsü atema mulunga agizükogo ta o jembiba angazükogo, ta Home Ministry otongdar kati ashi.
“Iba osangji tiyazü lir. India sorkari kodanga iba ama tenangzüktep mesüra telemtetba magi” ta otongdarisa shisem.
“Centre-i Nagaland state tuluba tentettsü mulunga agizükogo ta jembibaji tiyazü aser aibelena meyipzükba jembiba olen ka lir,” ta paisa osang jangjashitsüogo.