Manipur nung nisung ka tepset

Imphal, December 7 (Agencies): Ajak mulung nung tetsübu aidakja, nisung ka tenüng agi Elangbam Shyamo(48) ya kanga dang taochi makai Imphal West district nung alir Lillong Chajing Mamang Leikai-i kotari agü tsüngsetogo. Pa tasümang ya Hombar anepdang 10:30 shi nung idakji aliba nüburtemi ngutet.
Iba tatalokba nung sendaka alitsü ta temulung melemi bilemba nisung ka Singjamei police station nung pua lir. Iba nisungba tenüng ya police temi tang tashi memetetdaktsü. Osang ka ajanga ashiba agi, tang police temi pua aliba nisung ya asüsang den külemi mapa inyaker. Tenaprongla ya Thoubal district kübok Lillong Chajing tesem nung nursery farm nung inyaker.
Iba ken o dak sendaka aliba nisung nem temerenshi tesashi agüjang, ta khanga local temi Khangbok market nung National highway 102 Mongolbarnü 11:00 ako nungi mokdanga ayu. Iba sülen mapang tatsüka lir asüsanger kinungertemi Thoubal SP den oa ajurutep, aser parnok tsüngda tangatettep kati aruba sülen 2:00 ako shi nung lenmang mokdanga yur aliba ya agin. Iba ken o dak sendakba nung Joint Action Committee züngsemtemi nikongtsütsü Chief Minister den oa ajurutepogo.