Manipur nung nisung shibelener asem apu

Imphal, September 3 (Agencies): Hokolbarnü Manipur nungi tribal tetsür asem shibelener oya lia shibelener tetsür ana dena parnok asem puogo, ta police temi metetdaktsü.
Shibelener pua alirtem yagi northeast nung international jenjang nung nisung shibelenba maparen kanga züina aoba indang jungkai adoka metetdaktsüogo.
Shibelener oya lia kümzüker tetsürtem ya Churachandpur district nungi lir aser parnok ya sensaker kibongtem nungi dang liasü. Par asemprongla ya arishi küm 19 nungi 27 tsüngda lir.
Shibelenertemji Esther Lalpianmoi aser Lalngalomi ta jangjaogo aser tenaprongla ya arishi küm 32 lir. Tena den ano gari anisang Lunkhosat Haokip (31) dena anepongi 2:30 shi nung tetsürtem ya Myanmar arrtsü nung aliba Moreh jila leni bener oya lia apu. Parnok asemprongla tang police ket nung lir.
Churachandur district Superintendent of Police Rakesh Balwal-i ashiba agi, “Onoki tetsürtem kar arrtsü leni anir aotsü ta osang angazüka liasü. Tetsür sub-inspector ana aser anti-human trafficking unit puri tasa aika asaa liasü. Tetsürtem ya Moreh nung bendanger agent kar nem agütsütsü aser iba sülen Thailand-i anir aotsü ta onoki angazük. Parnok ya teküp ayokertem dang ayoktsüba liasü,” ta Balwal-i ashi.
Nisung shibelenertemi northeast nung aliba sensaker tsürapurtem nem sen agütsütsü aser par jala nunger tem nem bendang lima nung mapa tajung agütsütsü ta nangzüker anir aoer, saka parnok teküp ayokba maparen nung kangshia shilem agidaktsür.
Shibelenertemi police dang ashiba agi, parnoki tetsürtem tsürapurtem nem sen 10,000 agütsü aser ano parnok Moreh nungi aruba sülen sen 90,000 agütsütsü ta nangzük.
Parnoki tsürapurtem dang par jalanurtem ya Thailand nung mapa agütsütsü, ta nangzük.
Ketdangsertemi ashiba agi, iba ken o ya tang mezüngbuba ataloker masü aser northeast nungi tetsür aika mesüzüka bendangleni teküp ayokba nung shilem agidaktsü atema shibelenerogo.
Küm ishika tejakdang Manipur nungi tetsür asemi osangbenertem dang ashiba agi, parnok Singapore-i anir ao saka raliwalirtem nungi sen bendener parnok meyipa aru.
Parnoki ashiba agi, “Nisung shibelenertem nungi mejenbuteti northeast nungi tetsür aika lir.”