Manipur nung nisung tepsetba ken o nung High Court-i obendang agütsü

Imphal (Manipur), October 13 (Agencies): Manipur nung tamalen khatepdang nisung asüba ken o nung takoksa angur kibong nem sen 5 teyari agütsütsü atema High Court-i tetuyuba agütsüogo.
Manipur High Court-i state sorkar dang 2009 küm khatepdang khaset ta yazü kuli agutsüba tatalokba nung asür, Naoba Ngangbam tetsü nem sen lakh 5 teyari agüjang ta tetuyuba agutsü.
Osangbener den jembidang Manipur nung Human Rights Law Network Director, Meihoubam Rakesh-i, High Court-i Manipur sorkar dang takoksa angur kibong nem sen lakh 5 teyari agutsütsüla, kechiyong iba ken o nung tai tonglokja alirji state police commando tem lir, ta shiogo, ta metetdaktsü.
Law practice asür Rakesh-isa, “2009 küm May 6 aonung Sub Inspector L Bedajit leniba nung police commando telok kati Imphal west district kübok Uripok nung lanur ka tenüng agi, Naoba Ngangbam’er ki mita ao,” ta ashi.
“Pa anizüker ao aser tesülen paji khatepdang asü ta parnoki ashi. Commando tem jagi, asürji ozüng alema tentetba telungpur telok ka nung züngsem lir ta ashi,” ta paisa metetdaktsü.
Ajisüaka asür tetsü, Kamalini Ngangbam-i 2010 küm March 31, 2010 nü ochi temeten meshia High Court nem temepishiba ka agüja liasü, aser tang court-i sorkar nem iba tetuyuba agutsüogo.