Manipur nung NIT yangluba bushisüngdangtsü tuyur

Imphal, January 24 (Agencies): National Institute of Technology, Manipur yangluba nung senotsü tim mesüi amshiba atema Union Human Resource Development (HRD) ministry-i bushisüngdang ka asütsü tuyuogo.
Iba reju ya 2010 küm amenok aser iba yangluba nung sen tim mesüi amshiba den nüngdak maliba nung sen aika endok, ta HRD ministry-i ashir.
NIT Manipur ya 2011 küm nungi Rs 250 crore endoka yanglutsü tenzük. Langol Hills nung aliba NIT yangluba nung Rs 250-crore telatet alema sen endoktsüsa aküm aser yaküm May ita HRD indang expenditure finance committee dangi meyipa reprangshitsü atema tebilemba ka metetdaktsü.
Iba sülen ministry-i revised estimates agütsüba NIT indang campus ajak semdanga osang agiteptsü atema telok ka shimtet.
Iba telok jagi NIT Manipur semdangdang public sen crore aika mashi endokba ajitet.
Iba mapa ya Central Public Works Department nem ketdangsüa yangludaktsü saka parnoki “site complexity” junga mereprang aser tzüta ka nung mapa tenzük, ta HRD-i shimba telok nung ketdangser kati ashi.
NIT nung amshitsü atema sen aika endoka aliba lab equipment mamshii dang lir, ta parnokisa ashi.
HRD ministry nungi project monitoring unit (PMU) katia iba tesem semdang aser parnoki sen endokba indang audit ka agitsü junger ta tebilemba metetdaktsü.
Iba jagi HRD ministry-i Comptroller and Auditor General (CAG) dang special audit ka asütsü atema tetuyuba agütsü.
Iba osang ya Prime Minister’s Office dangia aben aser parnokia sen mashi endokba maparen bushisüngdangtsüla ta shiogo.
NIT Manipur director, Goutam Sutradhar-i yaküm mapa inyaktsü tenzükba sülen senotsü tangalen belena amshiba ama ajiteter ta osang metetdaktsü.
Sutradhar-isa ashiba agi, state government agency-i inyakba mapa kanga majung aser jara aser atem nung tapoktem adoka lir.