Manipur nung nonlocals nokdanger

Imphal, September 28 (Agencies): Manipur telungi non-locals aitba nokdangba maparen takangba inyaka Mongolbarnü Joint Committee on Inner Line Permit System (JCILPS)-i Imphal nung aayanger 13 puogo.

Non-locals ajakji West Bengal nungi kisüjensüba mapa asoshi aayangertem lir, aser parnokji Dimapur nungi Imphal leni mini-bus ka nung oyaa lia JCILPS züngsemtemi yashinep NH-39 Senapati district kübok Motbung tesem nung apu.

Taoba Hokolbar nungi non-locals nokdangba maparen tenzükba sülen Joint Committee pusemertem aser züngsemtemi non-locals 100 dak tema interstate passenger bus tem nungi anizüka peipei state temi meyipa yokogo.

Okram Ibobi Singh’er sorkari lisopurtem kümzüktsü atema bill ka agizüktsü asoshi parnok nem September 21 nü tashi anogo latetja liasü, saka sorkari ibaji meinyaktetba sülen Manipur nung kaketshir tentettem aser lokti tentet aikati akümba, JCILP-i bendangertem anema maparen tesashiba tenzükogo. Iba nokdangba nung ya kaketshirtem aser sorkar mapa inyakertembo maden.

Joint Committee Convener in charge, BK Moirangcha-i, Mongolbarnü apuba aayanger 13 ji apu ka yanglutsü atema special contractor kati nübo ayimba liasü, ta ashi.

Paisa aayangertem state-i anir arur transport operator aser contractor dang JCILPS indang Imphal office-i arua kuli agütsütsü jaokogo.

Aayanger 13 ji police ket nung agütsütsü, ta paisa metetdaktsü.

Non-locals nokdangbaji ‘India nunger anema inyakba masü’ saka Centre aser state sorkari Manipur liso nüburtem kümzüktsü atema ozüng ka meyanglutetba atema longkak aiter lir, ta Moirangcha-isa ashi.