Manipur nung osangkakettem ita 1 madoktsü

Imphal, June 26 (Agencies): Deobar anogo nungi tenzüka Manipur nung osangkakettem aser news magazine tem madoker, kechiyong state nung agent ka dang alibaji Kangleipak Students’ Association (KSA)-i shibangtsütsüsa aküm.
R. Gupta-i züluba aser Ramesh Publishing House, New Delhi-i publish asüba Manipur General Knowledge kakettemji agent, M/S P.C. Jain and Co.-i ayuba, sayaba aser ayokba jangjaogo. Item ya KSA-i nokdanger, ibayongji temerenshi agüja KSA-i iba agent indang dokan dang ita ka shibangtsü tuyua liasü.
Honibarnü KSA züngsem kari dokan ana- M/s PC. Jain & Co. aser M/s Jain Book Store mita aodang mangatettep aliba kaket, Manipur General Knowledge aika angu, iba sülen KSA-i item kaketji yimdong nung mi agi rongdok.
Ano külen Publisher-i, iba kaket nung memeteti inoksemba taitem atema tadok meshiogo ta osang angazüker. India nung adokba osangkakettem aser news magazine ajak atema Manipur nung agent ji M/s P.C. Jain and Co. kija lir. Anungji ita ka atema company anentsüba tetezü state nung ita ka piyong osangkakettem madoktsü.
KSA-i ashiba agi, “Iba kaketji tiyazü osang agi sünga lir aser nüburtem tamangba yirutsür. Manipur nunger indang chichiba tamangba yimsüji Lai Haraoba lir. Ajisüaka iba kaket ajanga, ibaji Shiva aser Durga-i tanga tsüngremtem aser tetsür tsüngremtem den tsüngsangba tetezü lir ta ashir.”
Iba kaket nung Chief Minister talangtiba inyaksang aser parliament züngsem, Rishang Keishing ji “nüjiso atema rarar ka” ta shia alibaji KSA-i ashishir. Keishing ya nüjiso atema rarar ka masü saka yimtenren nisung ka lir, ta KSA-i ashi.
Taoba mapang nung KSA aser Manipur Students’ Federation-i Manipur dak sentakba osang taitem indang kaket kar nokdanga liasü. Item kaket rongnung Manipur putiotsü kaket ka nung Mahabarata otsü nung Pandavas rongnung lasang mezünga akar, Arjun northeast-i aru aser Manipur chubatsür ka agi ta shia lir. Iba ya tamendakdak maka, ta KSA-isa metetdaktsü.