Manipur nung ozüng alema aayanger bendanger 250 apu

Imphal, April 08 (Agencies): Tesüiba anogo asem tsüngda Imphal aser temeket nung ozüng alema aayanger bendanger 250 dak tema apuba sülen police ket nung agütsüogo, ta Hokolbarnü Manipur nunger telok kati metetdaktsü.
Ajisüaka tang tashi nungbo ken o benoka aliba aayangertemji Bangladesh nunger asütsü akok ta bushitetba osangbo mali, ta Joint Committee on Inner Line Permit System (JCILPS) convener, Khomdram Ratan-i ashi.
JCILPS ya all lenden nung aliba kaketshir telok ajak densema Manipur nung lokti tentet 30 agi akümba tentet tulu ka lir aser JCILPS züngsemtemji timbaka kaketshirtem lir.
“Inter State Migrant Workmen (Regulation of Employment and Conditions of Services) Act, 1979 ozüng nung, tangalen nungi state-i arua aayanger ajaki labour department nungi mapa inyaktsü temelaba agitsüla. Ajisüaka aika ket nung iba temelabaji mali,” ta Ratan-i ashi.
Labour department ketdangser kati, mapa inyaktsü temelaba meshiba shidi karbo nguogo, ta ashi. Ajisüaka mapang shitak nung item temelaba magütsüba kulibo pai mashi.
JCILPS secretary, Jitendra Ningombam leniba nung JCILPS züngsemtemi Brihostibarnü Imphal nung aliba J.N. Institute of Medical Sciences nung mapa inyakertem mita aodang ozüng alema aayangertemji putet.
“Idakji tangalen nungi aayanger 63 rongnung parnok 42 ket nungbo mapa inyaktsü temelaba maliasü. “Aayanger ajaki mapa inyaktsü atema temelaba mangu tashi mapaji anena atatsü atema construction company dang metetdaktsüogo,” ta Jitendra-i metetdaktsü.