Manipur nung ozüng alema arur nisung 70 apu

Imphal, Monupii (May) 25 (Agencies): Manipur Police-i Brihostibarnü kuli kaket bena malir nisung 70 tashi apu.
Chief Minister N. Biren Singh-i ozüng alema arurtemi police booth balala ajanga aiter ta olen ka jembiba sülen ghonda ishika ka dang lir nisung 70 ji apu.
Parnok rongnung Rohingya tetsür tanur asem dena lir aser parnokji Imphal nung destitute home ka nung liasü.
Joint Committee on Inner Line Permit System (JCILPS)-i rongshiba manenba mapang ka nung Biren-i kuli kaket malir aser ozüng alema arurtemi Manipur telungi aitba noktangtsüla ta tetuyuba agütsü.
Temulung melemi bilemertem kar danga pura, parnoki ajanga aruba police station tem nung ketdangsertemi tebilemtsü abentsü, ta Chief Minister-isa ashi.
Nagaland den arrtsüa aliba Mao nung mezüngbuba police station nung nisung 60 apu. Parnok dang parnok tarudaki meyipa aotsü atema tetuyuba agütsü, ta police ketdangser kati ashi.
Assam den arrtsüa aliba Jiribam district nunga Jiri nung police-i nisung 6 apu.
Imphal east district nunga Rohingya tetsür tanur asem destitute home ka nungi meindok. Iba tesem nung aliba tetsürtemi par asem alibaji metet aser parnok meindoktsü atema takhangba agüja lungkak ait.
Police-i tetsür tanur asemji apu saka parnok tanur asübayong destitute home nungji yutsü. Ajisüaka, tetsür activist temi parnok alidak Rohingya tsürtem melidaktsütsü ta tekong meranga noktak.
Imphal jila tiyongtsü Hatta nung Rohingya nunger 10 tashi taa agüja ki ka nung liyonga aruba atema Chief Minister Biren Singh-i kanga süngmangba osang metetdakja liasü.