Manipur nung ozüng alema yi yangludak makdok

Imphal, March 6 (Agencies): Manipur kübok Thoubal district nung Indian-made foreign liquor (IMFL) yangluba factory ka police-ki makdok aser iba dak sendakba nung tetsür ka apu.
Tetsürlaji Rosy Changamayum ta jangjaogo, ta Superintendent of Police S Ibomcha-i ashi.
Hombar aonung mita aodang Old Monk rum bottle 1600 dak tema den bottle tazüng kar, chiyungtsü balala aser tanga osettem angu, ta police-i ashi.
Iba dak sendakba nung Mongulbarnü FIR ka benok aser police-i apubatemji tendangtsü atema Food Safety Standard and Enforcement Wing nem agütsü.
Tawa nisung kar yi nung miim jemsemba sülen asüba lendong atalokba sülen police-i iba mapa inyak. Ozüng alema IMFL yanglur ta asüba osangtembo liasü saka ozüngi memelaba factory ka madokbaji tang mezüng lir.
Manipur sorkari 1990 küm dry state sangdong aser Revolutionary People’s Front (RPF)-i January 1, 1991 nungi Manipur ajunga nung yi mayoktsü tenokdangba agütsü.
Iba anogo nungi liquor dokan 64 aser bonded warehouses 3 aliba shibang.
Gari lenmang anasa dokan kiburtemi yi ayok saka telungpurtemi parnok tetsüng nung injang khalokja merenshi.