Manipur nung petrol litre nung sen 300 agi yokdar

Imphal, November 13 (Agencies): Tang Manipur nung district tasen ana tentetba anema United Naga Council (UNC)-i mapang telatet ka makai rongsenkettsüng lenmang mokdangba ajanga Deobarnü nungi state nung petrol litre ka nung sen 300 agi yokdar.
Iba mokdangba sülen Manipur nung aliba petrol ayokdak ajak nung totzü temogo.
Ano külen, Assam tesem balala nung anendena aliba totzü abenba truck aser khu abenba garitem Manipur-i meina aotsü atema inyaktepdar.
Manipur sorkari UNC-i ayonga ghonda 48 mokdangba aser iba sülen mokdangba sendoka yutsüba ajanga ano Naga nunger tentettemi maneni longkak tesashiba aittsü lemtet.
Chief secretary, Oinam Nabakishore-i, “Melungtet telok kari memokdangtsüla.Onoki parnok dang mokdangba agientsü mepishir,” ta ashi.
Chief Minister, Okram Ibobi Singh-ia, “Armed police tem dang anendena aliba truck garitem aser totzü tankers meintsü atema tetuyuba agütsüogo,” ta ashi.
Gari teimbaka November 1 nungi Highway nung anendena lir aser Honibar aonung cement abenba truck kabo rongdoktsüogo.
Ano tetsürtemia Imphal nungi Naga nunger aliba tesemtemi khu belenba nokdanger.
Tang Manipur nung Petrol, diesel, kerosene aser LPG cylinders mangur aser aonsotsü nung jenjang kanga tuogo.
Jiribam aser Sadar Hills tesemtem nung aliba nüburtemi district tasen tentettsü atema sorkar rongshir aser iba ya ajanga longkak ait tenzük.