Manipur nung PM & Governor mesüka yanglur rongdok

Imphal, January 14 (Agencies): Union Home Minister-i North East state tem kümzüka ayutsü ta nangzüka Manipur nung Citizenship (Amendment) Bill, 2016 anema ola tuluba adoker.
Thoubal district nung Youth’s Action Committee for the Protection of Indigenous Peoples (YACPIP)-i Bill anema lungkak aitba sentong ka agidang Prime Minister Narendra Modi aser Manipur Governor Dr Najma Heptulla mesüka yanglur rongdok.
NH-102 nung Imphal-Moreh section nung school aser college balala nungi kaketshirtem aser tetsürtem dena nisung noklang aikati yimdong nung lungkak ait.
Lok Sabha nung Citizenship Bill agizükba anema YACPIP-i iba lungkak aitba sentong ayonga agi.
Manipur nung kaketshir telok 6- AMSU, MSF, DESAM, SUK, KSA aser AIMS-i Citizenship (Amendment) Bill 2016 anema lungkak aiter.
Lok Sabha nung Bill agizükba ya North East state tem nung aliba lisopurtem mezüngmeshiba mapa ka lir, ta YACPIP lennirtemi ashi.
Imphal East district kübok Khundrakpam nunga lungkak aitba sentong ka nung nisung aikati shilem agi.
All India Student Federation (AISF) Manipur state branch-ia Bill magizükba sayua Manipur state BJP president K Bhabananda dang Rajya Sabha menden toktsütsü takhangba agütsü.
“Babananda-i tebilemtsü bena menden nungi anentsüla” ta AISF state secretary, Kh Rameshwor-i ashi.
AISF-isa India President dang Citizenship (Amendment) Bill 2016 tagizük ta shia memorandum ka agütsütsü.
January 16 nü AISF indang national council senden ka amenba sülen parnoki memorandum ji agütsütsü.