Manipur nung PMGSY lenmang nung jang dena mesenzüteter

Imphal, Rongjui (September) 3 (Agencies): Manipur kübok Kangpokpi district nung Pradhan Mantri Gram Sadak Yojana (PMGSY) lenmang ka yangluba atema ashishitep ken o ka adokogo.
Thadou Students’ Association Sadar Hills-i ashiba agi, Bongbal Kholen aser Kamu Saichang tsüngda yangluba PMGSY road nung jang dena senzütsü makok.
Tawa tasen tentetba Kangpokpi district nung Thadou Students’ Association Sadar Hills-i kaketshirtem aser lokti dak sendakba onüktem atema mapa inyaker.
Bongbal Kholen-Kamu Saichang nung alirtemi PMGSY kübok yangluba gari lenmang tia kanga majungba atema ola adok aser iba atema TSA Sadar Hills-i President, Kammang Kipgen aser General Secretary, Thangtinlen Haokip na lenisüba kübok fact-finding team ka tentet.
Iba teloki tesem tonga oa bushisüngdangdang Bongbal Kholen aser Kamu Saichang tsüngda gari lenmangji Manipur State Rural Roads Development Agency (MSRRDA)-i ketdangsüa inyakba bushitet.
Bongbal Kholen aser Kamu Saichang tsüngda MSRRDA-i yangluba PMGSY lenmangji kangasa majung aser jang-ia anaronga süiteter. Iba mapa aitsür aser construction agency dang mepelar, ta TSA Sadar Hills nung Information and Publicity Secretary Lamgoulal Thomsong-i ashi.
August 29 nü kaketshir teloki tesem tonga oa mereprangdang iba mapa inyakba indang osangtem metettsü merang, saka idangji bill lemzüktsüba osang dang angu aser bangdak department nung mapa inyaker kati second stage indang E-Tender mapa inyakdar anungji ola tatok ta kaketshir lennirtem dang ashi.
Department nung mapa inyakeri kulikakettem agütsütsü melena jashitsüsa ang telangzüba agütsüba atema tejashi nung TSA Sadar Hills-i state sorkar dang lungkak aittsü ta metetdaktsüogo.
“Nassir ta ser Sub-Contractor kati iba mapa inyak ta TSA Sadar Hills-i osang tejangja angazükogo. Anungji September 7 matongdang state sorkari contractor dak tapet mapa inyaktsüla. Yamaji meinyakra TSA Sadar Hills-i iba tesem nung alirtem den külemi lungkak aitba sentong balala agitsü” ta Thomsong-i metetdaktsü.