Manipur nung Pro-Tem Speaker-i tenangzükba agi; Tanü ‘floor test’ agitsü

Imphal, March 19 (Agencies) : Hombar nung Manipur assembly nung trust vote agitsü lia, Deobarnü Imphal nung state assembly züngsem 60-i tenangzükba agiogo.
Yashi Governor, Najma Heptullah-i BJP MLA, V Hangkhalian Pro-Tem Speaker inyaktsü shim aser tanü Raj Bhavan nung pa nem tenangzükba agidaktsü.
Tawa Assembly elections nung Hangkhalian-i Churachandpur menden nungi takok angu.
Hangkhalian-i Pro-Tem Speaker inyaktsü tenangzükba agiba sülen Manipur Assembly nung pai tanüngba MLA tem tenangzükba agidaktsü.
Manipur nung BJP candidate 21-i takok angu aser parnok rongnung 17 tashi Assam yimtiba Guwahati nung amungba sülen Honibar nikongtsütsü Imphal tonga aru.
Shilem ana lemsar agiba Manipur Assembly elections nung Congress-i menden teimba nung takok angu saka parnoki sorkar akümtsü atema nübo peria mongutet. Congress MLA 28-i takok angu saka T Shyamkumar-i BJP nung adenba ajanga parnok nübo 27 aküm.
Külen BJP-i menden 21 nung takok angu saka NPF aser NPP den Independent MLA temi parnok pusema nungitba ajanga sorkar akümtsü tashi angu.
Taoba Bodbarnü Biren Singh-i Manipur nung Chief Minister inyaktsü tenangzükba agi aser iba mapang cabinet minister 8-ia tenangzükba agia liasü.
Hombarnü N. Biren Singh-i aniba teloktepi assembly nung parnok ket nung sorkar akümtsü nübo peria lir ta sayutsü Governor-i tetuyuba agüja lir.