Manipur nung question paper prokba ken o nung nisung 16 puogo

Imphal, April 09 (Agencies): Manipur state Board-i achaayanga agiba Class XII higher secondary tatidang indang question paper prokba ken o nung Honibarnü state police cyber crime unit-i kaketshirtem timba ser nisung 16 temelung melemteti puogo.
Bodhbarnü Council of Higher Secondary Education, Manipur-i ketdangsüba tatidang tenzüktsü minute 40 shi dang lia physics question paper WhatsApp nung proka liasü, ta council secretary, M Bidyasagar-i ashi.
Bidyasagar-i SP (Imphal West) nung ken o ka agutsüba sülen ibaji district cyber crime unit nem agutsü, ta police-i ashi.
SP (operations), S Ibomcha Singh leniba nung police-i iba ken o bushisüngdang aser kaketshir 12 densema nisung 16 dak melung melemi puogo.
Iba dak sentakba nung Honibarnü Manipur Education Minister, Thokchom Radheshyam-i, Class 12 Physics question paper prokertemji aputsü aser temerenshi agutsütsü, ta metetdaktsüogo.