Manipur nung Retd IPS ketdangser ka dena nisung 4 apu

Imphal, Chiteni (July) 6 (Agencies): Imphal West kübok Sekmai tesem nungi mejangjatetba nisungtemi tain pezü pur aoba rongnung retired IPS ketdangser A Kunjo Singh dena lir.
Deputy Inspector General of police (Range 1) K Jayanta Singh-i Imphal West aser Imphal East district tem repranger aser pai tanü osangbener dang ashiba agi, nisung taintem pur aoba osang angashiba sülen commando temi rescue operations tenzükogo.
“Parnok ya sen atema pur aoba liasü ta osang angazükogo” ta K Jayanta-isa ashi.
Par pezüji retired India Reserve Battalion (IRB) commandant Kunjo aser tangar asem lir aser parnok ajak ya Sekmai nung alir. Parnok Sekmai-Khurukhul Road nung evening walk aodang prangpong amer nisung kar gari ka nung arur par pezü pur ao, ta idakji alirtemi ashi.
“Par pezü kümzüktsü atema mapa inyakba den külemi tongtipang tesemtem nung aser police station ajak nung nüka mittsü indang osang prokshiogo” ta DIG-isa ashi.