Manipur nung school tem shibanger; NFR-i train reprangshimer

Imphal, January 4 (Agencies) : Tanep Manipur aser northeast tesem balala nung menoknok anokba sülen Manipur state sorkari taruba anogo tenetnü atema government aser private school ajak shibangtsü telemtetba agiogo.
Tanü Minister of State (PMO) Jitendra Singh-i menoknok nung takoksa angurtem den ajurutep aser Centre-i parnok yaritsü ta nangzük.
“Centre-i mulungsoa dang teyari agütsütsü. Prime Minister Narendra Modi-i iba tensa süoki ia bilemer. Nüngdakba ajak peria agütsütsü” ta Jitendra Singh-i osangbener dang ashi.
Paisa Manipur Chief Minister Okram Ibobi Singh aser Minister of State for Home Affairs Kiren Rijiju na den ajurutepa menoknok indang osang tejangja metetpela.
Rijiju-i ashiba agi National Disaster Response Force (NDRF) telok den central aser state government teloktemi northeast nung iba menoknok ajanga timtem ajuruba tesemtem nung yaritepdar.
Union Home Minister Rajnath Singh-ia takoksa ajuruba state ajak den Centre-i yariteptsü ta metetdaktsüogo.
Prime Minister Narendra Modi-i Twitter nung “NDRF telok dang Guwahati nungi menoknok ajanga timtem ajuruba tesemtem tonga oa yariteptsü tetuyuba agütsüogo” ta metetdaktsü.
January 4, 2016 anepdang menoknok anokba sülen Northeast Frontier Railway-i station balala nung goods aser passenger train ajak mapang reprangshimogo.
NFR indang sangdong ka nung ashiba agi, engineering department ketdangsertemi train lenmang, apu aser tanga tongtipang kiojentem reprangdang aser train senzüba mita reprangtsü maparen tenzükogo.