Manipur nung sen cr. 2.95 dak tema indang hon apu

Kohima, Mongputeni/October 04, 2019 (TYO): Tengnoupal District, Manipur telungtet nung HQ IGAR (South) kübok Assam Rifles-i Khudengthabi Check-Post lendanga ataba mapang, parnoki hon shibelener ka den hon long 47 pua liasü, ta PRO (DEF) sangdong ka ajanga metetdaktsü.
Osang tejangja ka angazükba nung ajemdaker October 1 Mongolbar anepongi Khudengthabi Check-Post nung Assam Rifles-i mita ataba mapang parnoki Silver sentsü van gari ka sot aser iba gari anisangji Moreh nungi Jamthoung Touthang liasü. Assam Rifles-i iba gari lapoka bushiba sülen hon long 47 ngutet aser item hon tuozük seret 7.771 shi liasü.
Jamthoung-i bena aliba hon jenjang ya sen cr. 2.95 shi asütsü, ta asadangtetter aser item hon ya gari tsüngbang nung meim yur liasü.
Iba maparen ano maneni bushisüngdangtsü atema pua liasng aser pa ket nungi ngutetba hontem Directorate of Revenue Intelligence (DRI), Imphal nem bendanga agütsüogo.
Maneni, kasa sangdong ajanga ashiba agi, Khudengthabi Check-Post nung ano Assam Rifles-i temesepba mozü shibelener ana apu aser tena ket nungi Brown Sugar aser WY tablets tem nguteta liasü.
Osang tejangja ka nung ajemdaker October 2 nikongtsütsü meta Assam Rifles-i Khudengthabi Check-Post lendanga ataba mapang, parnoki Silver sentsü Eeco Van (registration number DL 04 AS 4404) ka anendakja asüngdangya liasü. Gari anisangji Launching yimtak nungi Jamminlian Vaipheu liasü, ta jangjaogo.
Assam Rifles-i gari telung bushiba mapang parnoki Brown Sugar tuozük seret 3.336 aser WY tablets 20000 ngutet. Item mozü jenjang sen cr 7.2 dak tema asütsü, ta asadangtetter.
Iba maparen ano maneni bushisüngdangtsü atema pua alir ana den külemi tena ket nungi ngutetba mozütem tim ketdangsertem nem bendanga agütsüogo, ta kasa sangdong ajanga metetdaktsü.