Manipur nung sepia amakba tesem nung tasümang ka angu

New Delhi/Imphal, June 08 (Agencies) : June 04 nü Manipur, Chandel district nung telungpurtemi sepaitem amakba tesem anasa army temi ano telungpur tasümang ka nguogo.
Sepaitem osang ka ajanga ashiba agi, iba tasümangji Leibung yimtsüng anasa arem aser Deobar nü amakba tesem anasa angu. Tasümang nungji injang zübo asemliasü.
Imphal nung tasümang maitsüji jangjatsü, ta police osang ka ajanga shiogo.
June 4 nüa army temi NSCN (K) züngsem tasümang ka ngua liasü.
Osang ka ajanga ashiba agi Deobar nü amakdang sepai 18 asüba ya telungpur 25-28 shii amakba lir. Tangbo iba telokji nisung 4-5 telok aika küma lemsar Myanmar-i aitsü meranger. Sepaitemi operation sashia oaka iba nung jagi telok 2-3 shi takok ngua Myanmar telungi itetogo.
“Iba tesem nung jagi aotsü asoshi lenmang ana lir. Iba lenmang anaprong anatsülen nungi operation tenzükogo aser parnok karbo angutsü onoki imlar,” ta osang ajangasa ashi.
Tamakertemji timbaka KYKL nungi aser tanüngbaji Khaplang telok, National Socialist Council of Nagaland (NSCN-K) aser KCP (Kangleipak Communist Party) telungpur asütsü ta armyi temulung melemi bilemdagi.
Deobar nü telungpurtemi amakba 6 Dogra Regiment nungi sepaitemji truck gari pezü nung liasü.
Mezüngbuba truck nungji sepai 5-6 den totzü barrels bena liasü. Iba yongji telungpurtemi amakdang totzü barrel ji apok.Tanabuba truck nungji sepai 18-19 shi liasü, aser tanüngba truck ana nungji sepai 46 shi liasü.