Manipur nung shirurutem asoshi Maneka Gandhi-i mozü yok

Imphal, August 15 (Agencies): Union minister aser People for Animals (PFA) Chairperson, Maneka Gandhi-i Manipur nung tzümetsüng ajanga kongshir aliba kiset shirurutem atema mozü yokogo, aser kobi melii mozütemji veterinary camp tem nung lemshia agütsütsü.
Tzümetsüng tensa tajungba kümaka Thoubal district nung Wangoo, Leishangthem aser Tentha tesem tem densema nemzüka aliba tesemtem nung tang tashi tzü atsünga lir.
Item tesemtem nungi nisung noklang aika relief camp balala aser khen atema yangluba semtu balala nung jenoka liasü, iba den külemi parnok meyong kiset shirurutemji camp anasa shiki nung yua liasü.
Manipur PFA-i mepishiba nung ajemdaker Women & Child development Union Minister Maneka Gandhi-i rongtak mozütem Manipur-i yokogo, ta shiruru meimer tentet nung tongti ketdangsertemi ashi.
“Manipur nung tzümetsüng tensa osang onoki ozü Mendenbula (Maneka Gandhi) dangi yokba sülen, lai yokba mozütemji Bodhbar nü Thoubal nung aliba onok tongti office tonga aruogo,” ta PFA managing trustee, Lourembam Biswajeet-i yashi (Hokolbar) osangbenertem dang ashi.
Kobi melii PFA, Manipur aser shiruru doctor temi Thoubal district kübok tzümetsüng agi kongshiba yimtsüngtem nung shiruru asoshi health camps ayongzüka akatsü aser shiruru kiburtem nem mozü lemshia agütsütsü, ta ketdangserisa shisem.