Manipur nung süngdong lakh 10 atemtsü

Imphal, July 09 (Agencies): 68buba Vanamahotsava anogomung nung Manipur state forest department-i Hokolbarnü district 10 nung süngdong lakh 1.5 temogo aser department-isa tan ita süngdong lakh 10 atemtsü sentong lir.
1950 küm nungi tenzüka küm shia arem benjungmung ‘Vanamahotsava’ ya linük tesem ajaklen July ita mezüngbuba hopta nung mongyonga arur.
Iba anogomong nung Imphal anasa aliba Yairipok Top Chingtha nung osangbenertem den jembidang forest & environment minister, Th Shyamkumar-i, forest department kijai dangbo arem kümzüka meyutettsü anungji nüburtemi mulungsoa yaritsü nüngdak, ta metetdaktsü.
Alima tatsükba akumba ajanga lendong balala adokba atema tebilemtsü kaa pai, ‘Vanamahotsava’ anogomung ajanga alima kümzüka ayutsü atema süngdong aika atemtsü nüngdak, ta asenok dang nenshia metetdaktsür, ta ashi.
“State nung tzünglu tera tanga aru nung ayong tzü menenadoker, aser item kuli rongnung arem agi moapu kümdaktsüba densema lir,” ta paisa ashi.