Manipur nung tatembangbuba tongbang anogomung nung Tir, Pranab adentsü

Imphal, April 20 (Agencies): Manipur yimli atema British nunger yimsüsürtem den tatembangbuba tongbang raraba anogoji 1891 küm April 23 nü liasü, aser taruba Honibarnü iba anogomung nung linük Tir, Pranab Mukherjee-a ghonda ishika adentsü sentong renemogo.
Iba anogomung nung linük Tir-i state semdangbaji kanga tongtibang, kechiyong ibaji ajanga- Manipur yimli nüjiso atema tatembangbuba tongbangji kari jembiba ama 1891 küm April 25 nü masü saka iba anogo (April 23, 1891) nung lir ta India linüki agizüker.
Sorkar osang ka ajanga ashiba agi, Tir, Mukherjee ‘Red Carpet’ nung agizüktsü atema renemdar.
Tir atema military secretary aser Union home ministry-i Tir-i arrtsülen aliba state aser telungpur telok 50 dak tema aliba tesem semdangdang lendong mataloktsü atema inyakdar.
Joko mapang talangka telungpur telok kari kanga tongtibang nisungtemi state semdangba nokdanga aruba den külemi item ama sentong nung madentsü atema nüburtem dang  ‘public curfew’ sangdonger.
Ajisüaka ketdangsertemi ashiba agi, Honibar agitsü aliba sentongji ajanga Manipur sepaitemi Manipur yimli kümzüktsü atema taküm bendanga agütsüba sayur, anungji telungpur teloktemi iba sentong menokdangtsüa akok.
Tir, Mukherjee Tulihal airport atongba sülen IAF helicopter nung Kheba-i aotsü. Pai yangji nüngshilung ka sayatsüba sülen lokti den jembitsü.
1891 küm April ita nung British sepaitemi Assam melemsai alidang Cachar aser Kohima na aser taoba mapang Burma nung Tamu nungi Manipur amak, iba mapang nungji Manipur ya temeja yimli ka liasü.
April 23 nü Kheba hillock nung General Paona Brajabashi tepsetba sülen Manipur nüjiso makai aküm.
Ajisüaka karibo Manipur yimli atema tatembangbuba tongbangji Kheba nungi tera pilar, Tengol Lampak nung April 25 nü General Chong Miya leniba kübok tembang ta shia parnoki iba anogomungji April 25 nü amungtsüla ta takhangba agüja arur.
Iba mangatettep bentettsü atema 1982 küm Manipur assembly-i mongin nisungtem jaoka liasü. Puti otsü kakettem azüngba sülenbo tatembangbuba tongbangji, atangji April 23 nü liasü ta rateter. Mongintemi ashiba nung ajemdaker state sorkari küm shia April 23 nü iba anogomung mungyonga arur.