Manipur nung tensa majungba atema tebilemtsü akar: NBCC

Manipur nung Tenla ki ka rongdoktsüba sülen tangokba noksa nung angur.

Kohima, May 05 (TYO): Manipur nung Tenla kitem aser rejutem rongdoktsüba aser raksatsüba den külemi nisung asüba aser raraba tensa atema Nagaland Baptist Church Council (NBCC)-i jashir aser tebilemtsü akar, ta NBCC Tir, Rev. Dr. V. Atsi Dolie-i sangdong ka ajanga metetdaktsü.

Tang Manipur nung tensa mesüngjemtetba ajanga nisung aika kongshir; tanurtem, tantsür-tamburtem aser shirangertem danga maochir, aser iba ya ajanga teraksatsüba tulu bener arutsüogo, ta NBCC-i metetdaktsü.

“NBCC-i Manipur sorkar aser Centre sorkar na dang tang tensa azüoktsü atema tekaraba nung inyaktsü mepishir. Onoki sorkartem dang iba tensa ya jungjunga azüoktsü aser aibelenertem nem temerenshi agütsütsü atema mera agia inyaktsü mepishir,” ta sangdong nung shia lir.

“Onokisa Manipur nung aliba nüburtem dang süngjemtsü aser mangatettep ken otem junga bentettsü atema maongka agütsütsü mepishir. Rara aser teraksatsüba ajanga timtem dang tali bendenloktsü. Teti atema ken otem bentettsü atema lenmangji yimjung nung ken o jembiba dang lir,” ta sangdong nung shia lir.

“Tatemsa onoki NBCC kübok Baptist Arogotem dang tang tensa tajungtiba nung bentettsü atema sarasademtsü ayongzüker. Tsüngremi iba tensa ajanga kongshia alirtem aneptsütsü, yimjung aser tesünep agütsütsü atema sarasademtsüba den külemi ken o jembiba nung shilem agirtem nem shisa tajung agüjang ta sarasademtsütsü ayongzüker,” ta NBCC-isa metetdaktsü.

“Tang ama tensa ka nung NBCC-i Manipur nung alirtem nungiter aser iba tensa ya mita repranga atatsü. Tang tensa tajungtiba nung bentettsü atema ajak longjemer inyaktsü NBCC-i ayongzüker,” ta kasa sangdong ajanga mepishia metetdaktsü.