Manipur nung tensa tajungba akümer; curfew salar

Imphal, December 22 (Agencies) : Manipur nung tensa tajungba küma odar. Tanübo tatalokba balaka maliasü aser Imphal nung district anaprong nung curfew ozüng tera salatsü.
Ajisüaka, aonung 9:00 ako nungi tenzüka ghonda 7 curfew ozüngbo alitsü, ta Imphal East aser Imphal West, District Magistrate-i metetdaktsü.
December 18 nungi mobile internet services shibanga lir aser ibaji Khristmas tashi atsülangtsü ama bilemer.
Brihostibarnü Manipur nung civil body kati lokti sentong ka ayonga amung. Manipur state nung kin balala aliba tsüngda tesendaktep tajungba akümtsü nükjidong nung telok balala agi akümba civil body jagi iba sentong ayonga agi.
Parnokisa, United Naga Council (UNC) dang anogo 52 tashi gari lenmang nokdanger lungkak aita aruba Khristmas matongdang anentsü atema mepishia metetdaktsü.
Tanü sentong nung nisung meyirjang aika aden aser parnoki gari lenmang nokdangba ajanga tang nüngdakba chiyungtsü aser osettsüsettem agi anünger aser jenjang kanga tasak kümogo ta tebilembatem lemsatep.
Ano külen, Lok Jan Shakti (Manipur State Unit) otongdar N Ibobhal-i ashiba agi, Centre aser state sorkartemi gari lenmang nokdangba atema süoki ia mebilemer ta aitsü.
Tanü drivers’ association kati state sorkar dang, UNC-i Khristmas matongdang tenokdangba magienra sorkari drivers aser handypersons nem licensed guns agüjang ta takhangba agütsü.
December 18 nü Khurai tesem nung alirtemi Imphal-Ukhrul lenmang nung UNC anema lenmang nokdangba sentong ka ayongzüka agi aser iba mapang parnoki passenger bus gari 22 tashi raksatsü aser kar rongtoktsü. Iba lendong ajanga Imphal East district nung curfew alitsü ozüng benok.