Manipur nung tensa tajungba kümdar: CM

Imphal, October 19 (Agencies): Manipur Chief Minister N. Biren Singh-i ashiba agi, Manipur nung ita trok tejakdang BJP puri sorkar kümtetba sülen nungi state nung temzüng ozüng tsütsü kanga süngjema kümogo.
Iba olen ya pai Manipur nung police force amenokba sülen küm 125 ajungba benjungmong mapang o jembidang ashi.
Biren Singh-i ashiba agi, “state nung yimjung aser tesunep bener arutsü asoshi police aser nüburtem külemi teka amteper inyaktsü nüngdaker. Tenem len alirtem aser yimdak yimtsüng nung alirtemi kü dang police force tali yoktsü asoshi mepishir, koba temaitsü tajungka lir.”
“Taoba ita asem tsüngda nung lokti ronger atua ozüng raksaba maparen anenogo. Nisungtemi ken o balala police nem agütsür aser iba ajanga nüburtem tangatetba akümba sayur.
“Manipur ya state tasen ka masü. Iba state ya kümteter küm 2000 dak tema lir koba tezüluba nunga angutsü. Tang sorkari iba state ya kümzüka ayutsü asoshi bendanga agütsür inyakdar aser iba ya kecha dena memelenteptsü,” ta Chief Minister-i maneni shisem.