Manipur nung tetsür kaketshir ka dak injang agi akah

Imphal, February 19 (Agencies) : Manipur nung Hokolbarnü, telungpur ta temulung melemi bilemba nisung kari tetsür kaketshir ka dena parnok nisung asem dak injang kahlokja yirutsü, ta police osang ka ajanga ashi.
School van anishir Yumnam Suraj Imphal anüdoklen aliba district, Wangkhei nung restaurant ka nung lia lanur asem iba tesem jagi aoksa arur pa dang o kar asüngdangba sülen injang agi akah.
Iba mapang Churachandpur district nungi Imphal nung azünger tetsür ka pa den liasü aser la daka teben nung akah.
Injang ola angashia restaurant kibutsüla, Romila tesem jagi aru aser iba mapang la daka teku nung asemben tashi akah. Tang la tasü taküm tsüngda mozü kidang yaridar.
Tetsürlaji gari anishisangi iba restaurant jagi anir ao aser pai ashiba agi tenati mapa tamajung kecha meinyak. Ajisüaka osang ajanga ashiba agi, tena tsüngsanga liasü.
Gari anisang yagi iba aiürji kechi atema restaurant-i anir aru-ar rasaa meshitet. Shibangtsür aliba telungpur telok kari state nung shi jangraba tsütsü shingaia aibelen masütsü atema sangdongba sülen iba ledong ya atalokerba lir.
Nüknarar mongtepba tesem ta shia nüburtemi restaurant karbo rongtoktsüogo.
Hokolbarnü atalokba lendong ya shibangtsür aliba telungpur mapa lir, ta police-i ashi ajisüka telok shingaia ano tenüng magi.
Iba lendong atalokba mapang resturaunt kibubabo yaji mali asü.