Manipur nung tribal kaketshirtemi NH-2 nokdanger

Imphal, October 30 (Agencies) : All Tribal Students Union Manipur (ATSUM)-i October 27, 2016 ayaterm nungi national projects aser rongsenren tsütsü tenokdangbatem agütsüba ajanga Nagaland kübok Gopibung yimtsüng anasa National Highway-2 nung truck gari noklang aika anendena lir.
Iba lungkak aitba sentong azüoktsü atema police force aser Assam Rifles battalion ka mapa lemzüktsüogo saka parnoki ATSUM pusemertem mazüokteter.
National highway agi sendaktepa aliba district aika nung kiojen aser osettsüsettem raksaba osang angazüker.
ATSUM-i Manipur University nung Scheduled Tribe (ST) quota kübok noklang nung shilem 31 lemzüktsütsü atema takhangba agütsür.
Shilem melemzüktsü tashi tribal kaketshirtemi Manipur University nung admission mesüi atatsü atema parnoki tetuyuba agütsüogo aser iba tetuyuba sülen manidakba kaketshirji tribal anema noktakertem ta züngshitsü, ta ATSUM-isa metetdakja lir.
“2012 küm amendment Act, HRD-i tetuyuba agütsüba aser October 26, 2016  nü High Court-i tetuyuba agütsüba ama mapa inyaktsü onoki akhanger” ta All Naga Students Association, Sheth Shatsang-i ashi.
“Manipur nung PG courses azüngtsü atema tribal kaketshir shingaia iba onük teti atema telemtetba tajung ka magi tashi, admission magii atatsü tetuyuba agütsür,” ta Sheth-isa shisem.