Manipur nung UNC-i mokdangba anener

Imphal, March 19 (Agencies) : Manipur nung United Naga Council (UNC)-i ita pungu jungnüa rongsenkettsüng mokdangba Deobar ayaterm nungi anentsü.
Senapati nung United Naga Council (UNC), Centre aser Manipur sorkartem tsüngda senden ka amendang iba telemtetba agi, ta osang metetdaktsüogo.
Senapati Deputy Commissioner office nung state sorkar, UNC aser Centre sorkar tsüngda senden amen. Senden nung India sorkar tenüng nung Ministry of Home Affairs – North East in-charge, Satyendra Garg aser state sorkar tenüng nung Additional Chief Secretary (Home) Suresh Babu o Works Commissioner K. Radhakumar na aden.
UNC president Gaidon Kamei-i anir lennirtem aser All Naga Students` Association Manipur (ANSAM) o Naga Women Union (NWU) nungi tirtem senden nung aden aser parnoki ano ita ka tsüngda ajurutepa senden amentsü telemtetba agi, ta UNC General Secretary S. Milan-i ashi.
Mokdang anentsü telemtetba agiba sülen UNC President Gaidon Kamei aser Publicity Secretary S. Stephen na tepuokdak nungi kobi melii chioktsü imlar. Tenangzükba agiba nung mokdangba mapang ken o benokba ajak shibanga ayutsü lateta lir.
Mokdangba mapang highway tem nung mejangjatetba nisungtemi truck gari aika rongdoktsü, driver tem dak teka sangshi aser sepaitem amak.
November 1, 2016 nungi UNC-i Manipur nung national highway anea nung rongsenkettsüng mokdangtsü tenzük.
Manipur kübok Tamenglong, Senapati, Ukhrul aser Chandel tesemtem nung Naga nunger teimba ser alir aser iba nungi district tasen 7 tentetba magizüker ta shia UNC-i lungkak aittsü tenzük.
Manipur nung district tasen tentetba ajanga Naga nunger litsü nung kongshir aser iba ya state assembly elections nug vote raksatsütsü atema inyak ta tai tonglokja UNC-i National Highway 2 aser 37 mokdangtsü tenzük.
UNC-i National Highway ana nung Imphal leni aoba truck gari ajak nokdang aser parnokisa Trans-Asian Highway nokdang.