Manipur nung yimjung lira terenlok alitsü: Prahlad

Imphal, October 05 (Agencies): Bharatiya Janata Party (BJP) Manipur Pradesh in charge aser MP, Prahlad Singh Patel-i, Manipur nung alima tobur ajung tesem aika lir aser state nung yimjung lira terenlok alitsü, ta ashi.
Deobar nü BJP Kakching Mandal-i ayongba Deen Dayal Upadhyaya Maha Prasikshan Abhiyan 2015 sentong nung jembidang Prahlad Singh Patel-i, kin telemsa kecha makai BJP-i linük nung terenlok kadaktsütsü meranger, ta ashi.
Paisa, Centre nung Ato kilonser Narendra Modi-i aniba sorkari nüburtem tajangzük angutsü atema scheme aika benokogo, ta ashi.
Sensakertem aser tangar memenepba nüburtem atema Centre sorkari ano scheme tasen aika benoktsü, iba den külemi Northeast nem maongka balaka agütsütsü sentong lir, ta Prahlad Singh Patel-i ashi.
Item mapatong ajunga takok ngua inyaktettsü atema tesem nung aliba nüburtemi yariteptsüla, ta paisa ashi.
Iba sentong nung BJP Manipur Pradesh Tir, Th Chaoba, taoba minister tem- Dr Nimaichand Luwang aser M Hemanta na, retired DGP, Y Joykumar, BJP Manipur Pradesh office ketdangpurtem- Premanda, Ashini Kumar aser Rameshwor nungera dena liasü.