Manipur nung Yimozülur amokmerenertem putetogo

Imphal, January 10(Agencies): Manipur nung telungpur telok ajanga osangkaket nung yimozülurtem amokmerenba Manipur Police-i jangjaogo.
December 26 nü Pandam News indang office nung hand grenade ka den külemi shidi ka nung “yimozülur nem küm tasen sempet” ta zülur yuja liasü. Iba ajanga local osangkaket adokertemi December 27 nü ghonda 24 mapa meinyaki longkak aita liasü.
Telungpur telok, Kangleipak Communist Party (Lamyanba Khuman) nung kanga teyakyak Mohen Kangabam, (63), ya police temi Honibar aonung apu aser par kidang senotsü meshia züluba shiditem yua aliba ngutet.
Iba amokmerenba ya telungpur telok troki akümba Corcom ajanga inyaka liasü, ta Assam Rifles ajanga ashi.
“Mohen-i pa tai nangzükogo. Nepal nung atsükoka alitsü südi, ta temolung melemi alisang telungpur C-inC L. Mangoljao (Lamyanba Khuman) tetuyuba nung ajemdaker pai iba mapa inyakba nangzüka liasü,” ta police-i metetdaktsüogo.
Imphal West nung Additional Superintendent of Police (Operation), S. Ibomcha lenniba nung iba bushisüngdang mapa inyaka liasü.
Editors’ Guild Manipur-i police ket nungi iba official osangbo ano mangu, ta Kangla Pao osangkaket nung yimozülur P. Labango Mangang-i osangbener dang Mongulbarnü shia liasü.
“Telungpur telok balalai sünga aliba tesem nung kanga nendaka inyaker osangkaket zülurtem nem timtem magütsütsü asoshi onoki mepishir. Onok mapa shitak inyakdaktsütsüla,” ta paisa shisem.
Tang aruyaa aliba election nung tashiyim agi sen sarur tali adoktsü südi ta osang angazükba sülen district nung sepaitem tali kümkümogo, ta police-isa ashi.