Manipur nung yipru agi ki aika raksatsü; Assam nung nisung ka ponger ao

Imphal/Guwahati, April 3 (Agencies) : Manipur nung nung yipru ajanga kiojen aika raksatsüogo aser ano tesem karbo tzü agi metsüngbanga lir, ta Hombarnü ketdangsertemi ashi.
Tesüiba anogo pezü tashi India kübok northeast nung tzünglu tanen makai aruba ajanga nisungtem timtemer.
Tsüngsang-mopung tetzürtemi tzüngluji Deobar tashi nungbo anentsü ta ashi saka Hombar nüa northeast tesem balala nung tzünglu den rü tsükogo.
Tanü Deputy Chief Minister Y. Joykumar-i Imphal nung tzü agi metsüngbanga aliba tesem kar semdanga liasü.
“Sorkari mapa inyaktsü atema collector tem dang osang tejangja agütsütsü onoki tuyuogo. Nüngdak dang süra relief camp tem lapoktsü” ta Joykumar-i osangbener dang ashi.
Manipur cabinet-isa tzümetsüng timtem atema action committee ka tentettsü telemtetba agiogo.
Hombarnü Revenue, Relief and Rehabilitation, Food and Public Distribution Minister, Karam Shyam-i tzümetsüng timtem ajuruba tesemtem semdanga liasü.
“Timtem ajurutem atema relief materials kar agütsüogo. Maneni ajak nem teyari agütsütsü” ta Karam Shyam-ia metetdaktsü.
Yipru agi kilem ponger aoba sülen talidak makaba nisung aika relief camp lapoka maliba agi community halls aser local youth clubs nung jenoka lir.
Lumding aser Silchar tsüngda anentsüh aluba ajanga national highway nung mesenzüteter aser Jatinga o Doorbin Tila nunga anentsüh ajanga gari lenmang anenbanga lir, ta osang ka ajanga metetdaktsü.
Dima Hasao district kübok Kapurcherra nung tanep school tesayur ka tzümetsüng agi ponger ao. Iba tesem nung tzünglu maneni aruba den yipru aonba ajanga district administration-i Hombarnü school ajak shibangtsü tetuyuba agüja liasü.
North east kübok Sikkim dak alaka tanüngba state ajak nung April 4 & 5 anogotem rülung aser yipru den tzünglu maneni arutsü ta Met Department-i osang metetdaktsüogo.
Arunachal Pradesh, Assam, Meghalaya, Nagaland, Manipur, Mizoram aser Tripura nung tzünglu arutsü ta Met-i ashi.