Manipur nung yipru aondang tetsür 3 asü aser aika yiru

Imphal, April 15 (Agencies): Hombar anepdang Manipur nung yipru tesashi ona tzünglu arudang lendong balala ataloka tetsür asem tashi asü aser kaketshir aika yiru.
Tanep 10:00 ako meta Bishnupur, Kakching aser Churachandpur district tem nung yipruji süi.
Churachandpur kübok K Salemjang yimtsüng nung ki ka chirepdang tetsür ana taküm sama. Tenaji Salemjang yimtsür Nemden (74) aser Kulbung yimtsür Chinkholhai (50) na liasü ta jangjaogo.
Ano, Kakching district kübok Wairi nung süngdong ka laoa Y Nungsitombi (56) anenset.
Bishnupur district nung school aser tanga reju aika raksa aser lendong balala nung kaketshir den nisung 40 dak tema yiruba osang angazüker.
“Kiojen aika raksaogo anungji district nung bangdak ketdangsertemi osang agütsüba sülen ang osang ajunga metettsü” ta Churachandpur district nung ketdangser kati ashi.
Manipur nung model code of conduct ozüng agüja lir anungji relief maparen inyakra, ibaji ketdangsertemi dang inyaktsüla ta district election officers ajak nem tetuyuba agütsüogo.
Lendong balala nung relief works/measures inyakdang candidate mesüra yimtenren lennir mesüra political party shingaia teka maitsüla ta Manipur Chief electoral officer PK Singh-i tetuyuba agütsü.