Manipur nung ZUF züngsem ka kahset

Imphal, September 13 (Agencies): Manipur kübok Tamenglong district nung Hombar aonung National Socialist Council of Nagalim (Isak-Muivah) züngsemtem den kahtepdang Zeliangrong United Front (ZUF) züngsem ka kahset.
Iba lendong ya Taodaijang yimtsüng nung atalok aser tanep police aser Assam Rifles telok ka tesem tonga ogo, ta police osang ka ajanga metetdaktsü.
Police-i tasümang ka angu aser paji Ajuram yimer Paouwalung ta yimdaklirtemi ajitet, ta parnokisa shisem.
NSCN (IM) aser ZUF telok ana ya tsükchirtem lir aser parnok tsüngda mapang shia kahteper.
Iba tesem nung sepaitemi telungpurtem mita aotsü tenzükogo. India sorkar aser NSCN(IM) tsüngda ceasefire tenangzüktepji Manipur nungbo mali.
Manipur kübok Tamenglong district Nagaland den anasatepa lir aser iba jagi mapang shia telok anaprongla nungi züngsemtem iba district-i arur.