Manipur nunga Naga People’s Front telok 2 lemdanga lir

Imphal, November 1 (Agencies): Nagaland nung Naga People’s Front (NPF) sasep nung mangatettep adoka aliba Manipur state tongogo. NPF Manipur state unit telok ana lemdangogo, ka Nagaland chief minister TR Zeliang pukümer aser ka taoba CM Shurhozelie Liezietsu pukümertem lir.
Ajisüaka, Manipur nung N Biren Singh’er sorkar nung adenba NPF MLA pezüji TR Zeliang’er telok nung dena lir.
Centre aser NSCN (IM) tsüngda yimjung olemtep tatembang kati aruba mapang Manipur litsü kümzüka ayutsü atema Honibarnü Manipur chief minister-i party ajak senden ka ayonga amenba mapang NPF telok anaprongi sangdong balala agütsü.
Manipur nung Shurhozelie’er telok nung tirji ex-minister Morung Makunga lir aser külen TR Zeliang’er telok tirji MLA Awangbow Newmai lir.Shurhozelie’er teloki sangdong ka agütsüba nung Biren Singh-i jazükba senden nung parnok madentsü ta ashi.
“Iba senden nung shirnoki NPF party tenüng nung shilem agidir, parnokji official nübotem ta mezüngoktsüla” ta sangdong nung shia liasü.
Iba senden nung NPF MLA pezüprongla maden ta senden nung adenertemi ashi.
Külen, Zeliang’er teloki ashiba agi, Morung Makunga masü saka Awangbow ang NPF Manipur unit tir lir.
“Pei sasa lennirtem ta jatetba nisungtem nübortemi mashileni anisatsü merangba aser state nung tensa raksatsüsa mapa inyakba NPF Manipur state unit-i aitsür” ta Zeliang’er telokisa ashi.
N Biren Singh-i aniba sorkari lokti nung teputep adoktsütsü, state nung yimjung aser azükaru bener arutsü atema inyaker, anungji iba tensa raksatsütsü merangertem aitsür, ta parnokisa shisem.