Manipur nunger taginüba angadanger ang telemtetba agitsü : Centre

New Delhi, November 9 (Agencies) : Manipur nunger lokti nung shilem ajak indang taginübatem angadanger ang bill asem indang telemtetba agitsü ta Hombarnü Centre-i metetdaktsü.
Manipur Legislative Assembly-i Union Home Ministry dangi “The Protection of Manipur People Bill, 2015”, “The Manipur Land Revenue and Land Reforms (Seventh Amendment Bill), 2015” aser “The Manipur Shops and Establishments (Second Amendment Bill) 2015” atema Presidential assent meshia agüja lir.
“Ministry of Home Affairs-i state sorkar, tenemlen aser lenden nung alir ajak den asüngdangya asüba sülen ang telemtetba agitsü. Ministry-i tamasa Manipur nung aliba nütsüng yongsük ajaki aginüba angadangtsü” ta Ministry sangdong ka nung metetdaktsü.
Manipur nungi Joint Action Committee (JAC), All Tribals Students’ Union of Manipur (ATSUM) aser Manipur Tribal’s Forum, Delhi (MTFD) nungertemi bill asem atema Home Minister Rajnath Singh aser tanga tongti ketdangsertem den ajurutepa tebilemba lemsatepogo.
Manipur nung telok kari Bill asem anema noktaker aser taoba ita ana tashi parnoki lungkak aita arur. Iba lungkak aitba sentong nung nisung 9 tashi taküm samaogo aser parnok den asüpila sentong tanü tashi magi lir.