Manipur nungi JNU kaketshir asüba bushisüngdangtsü akhanger

Imphal, October 27 (Agencies): Tawa Delhi nung aliba Jawaharlal Nehru University (JNU) nung Manipur nungi kaketshir, JR Philemon Raja asüba kanga junga bushisüngdangtsüla, ta Manipur nunger kaketshir tentettemi takhangba agütsüogo.
Mongolbar aonung Senapati district kübok Sadar Hills tesem nungi Philemon tasümangji Brahmaputra Hostel nung anguba sülen Delhi Police-i tasümangji postmortem agitsü atema AIIMS mortuary-i bener ao.
Mezüng bushisüngdangba sülen police-i, pa soseta asüba asütsüa akok, ta metetdaktsü.
Küm ka jakdang Philemon ya West Asia Studies nung PhD agitsü atema JNU nung admission agia liasü. Osang ajanga angazükba agi, tesüiba anogo asemnü tashi pa pa takdang shibanger telung nungi madoki liasü.
Pa mezüng Sainik School, Imphal (SSI) nung zünga liasü.
Kuki Students’ Organization (KSO) general headquarters Tir, Paotinthang Lupheng-i, “iba osang angazüka onok aoksar. Kaketshirji mejangjaba kuli ajanga asünungji pa asüba kuli tejangja metettsü atema jungjunga bushisüngdangtsü onoki akhanger,” ta ashi.
Ano Manipur University Tribal Students’ Union Tir, Thangtinlen Haokip-ia, iba kuli tejangja metettsü aser aibelenertem nem tapet temerenshi agütsütsü atema iba ken o tekaraba nung bushisüngdangtsüla, ta takhangba agütsüogo.