Manipur nungi Naga tsür pilot nem tenüngsang agütsü

Imphal, October 20 (Agencies): Manipur nungi mezüngbubua Naga tetsür pilot, Rovienai Paotei-i lai takok angubaji Tsüngrem aser lar tsürabur ajanga lir ta tenüngsang agütsü.
Bodbarnü Senapati nung aliba Poumai Baptist Church nung tenüngsang agütsüba sentong ka nung jembidang Rovienai Paotei-i iba osang metetdaktsü.
Rovienai ya Senapati district kübok Purul Atongpa Rosofii nung alir PD Sele’er jala lir, aser la anogo ishika tejaklen lar kidangi aru. La aruba mapang Imphal Airport nung nisung aika adenshia la pelaa agizüka liasü.
Lai mezüngbo medical doctor ka akümtsü alizüng liasü saka ibaji melenshi, ta Rovienai-isa metetdaktsü.
La Australia nung final examination agütsütsü asoshi renema aliba mapang lai tebu kanga mejungi shirangba osang angazük. Iba jagi lai tatidang atema junga merenemtet aser la temulung kanga shirang, ta Rovienai-i o jembidang ashi.
La New South Wales, Australia nung aliba Basiar Aviation College nungi graduate asü aser idakji lai commercial pilot course azüng. La ya tang Jet Airways nung pilot teinyakdak lir.
Iba sentong nung PHED Minister Losii Dikho, Ex-MLA Alexander Pao, Chairman, ADC, Senapati ML Markson, Ex-Minister R.K Thekho, President Naga Mother’s Association, President, Naga Women Union, SDWA,SDS, PNU, PNTM, SKABU pastors, Fr. Sisou John aser lar kibong den medemertem aden.
Minister L Dikho-ia Rovienai Paotei nem tenüngsang agüja jembidang, lai kanga meranga inyakba ajanga alizüng tulu ka tongtetogo, ta ashi.
Naga nunger rongnung Rovienai Paotei ji ajaki metetba tetsür ka kümogo aser lai takok angubaji asenok ajak nüma atangtsü mapang ka lir. Mapa tasak ka nung lai takok anguba ajanga tangartem ajungmesotsü, ta Dikho-isa shisem.