Manipur putiotsü nung mezüng atema sorkari ketdangsertem den sensaksem

Imphal, Rongchii (April) 9 (Agencies): Manipur sorkar ketdangsübaren putiotsü nung tang mezüngbuba atema Chief Minister N Biren Singh lenisüba kübok state sorkari tongti ketdangsertem den yimjak nung sensaksemba mapang ka agiogo.
Iba sentong ya Tentonü (Hombar) anepdang 11:00 ako nungi City Convention Centre nung tenzük aser cabinet Minister aser MLA tem den state nung tongti ketdangsertem ajak aden.
Iba mapang Chief Minister N. Biren Singh-i sorkar ketdangsertem dang parnoki tebilemba, asalentong aser mapa inyaka arudang ajuruba khurettem lemsateptsü atema mapang lapoktsü.
“Tangar dang nungi nenoki tajungba meteta lir, anungji nenoki alima aser rejutem nungi bendenba shisatsü amshia sorkar ketdangsübaren mapa tajungtiba kümdaktsütsüla” ta paisa ashi.
Sorkar mapa inyakertemi nendaka mapa inyakba ajanga küm ka tsüngda temelenshi bener arutetogo, ta Chief Minister-isa ashi.
“Tang ozü sorkar küm anabuba nung ayaoka inyaker aser tebilemba talila aginür, tali nendaka inyakdaktsünür aser shisatsü agüja sorkari state nungi ochimashi agientsü alizüng tongdaktsünür” ta Biren-isa ayongzük.
Tawa tenzükba “Go to Village” scheme atema paisa ashiba agi, “Iba scheme ya taküm Chiteni (July) nungi tenzüktsü sentong lir aser iba nung department ajak nungi ketdangsertemi amalitepa yariteptsüla. Sorkari yimdaklirtem taküm libaliro tajungba kümdaktsütsü merangba nung ketdangsertemi yariteptsüla.”
“Go to village” yimyim ya lendenlen aliba yimtsüngtem atema dang masü saka yimtsüng ta asübaji state kübok district ajak nung aliba yimtsüngtem ashirba lir, ta Biren-isa shisem.
Deputy Commissioner jenjang nungi ketdangser ajaki yimdaklirtem indang khurettem metettsü merangtsüla aser nüngdakbapur ajak nem sorkar scheme nung teyaritem agütsütsü. Iba sentong kübok Social Welfare department, Water Resource department, Agriculture department amala indang scheme balala amshitsü, ta chief minister-isa metetdaktsü.
Churachandpur district administration-i mapang shitak nung women market shed yangluba atema Biren Singh-isa tenüngsang agütsü aser Civil Service day nung Churachandpur Deputy Commissioner nem sempet ka agütsütsü ta paisa shisem.
Iba mapang MSC Ranjan Yumnam-i sorkar dang nisung shiai Aadhaar Card khen register asüba ajanga department ajak nungi teyaritem angutsü atema inyakyim ka tenzüktsü tebilemba shidang.
Sorkar indang scheme balala angutsü atema tang ya nisung kati department shia den Aadhaar card register asütsüsa akümer, ta Ranjan-isa ashi.
Police ketdangsertemia parnok ket nung gari peria maliba ajanga mapa inyakba nung tetsükdaktsü ajurur ta ashi.
Taxation department ketdangseria tang tashi nung department indang office balaka mali ta khuret lemsatep.
“Ni office nung mapa inyaktsü tenzükba sülen taxation office punguben tashi melenshiogo” ta department nung Superintendent-i ashi.