Manipur rongsenkettsüng lenmang mokdangba anema mokdanger

Imphal, June 13 (Agencies): Manipur nung tribal teloktemi, talisa Manipur nung tenemlen aliba district temi anogo 10 nü tashi rongsenkettsüng lenmang mokdangba sülen maneni Hombar nü nungi tenzüka lendenlen aliba district temia ibaji anema mokdangba sentong tasen ka tenzükogo.
Tanü Imphal-Ukhrul gari lenmang nung tetsürtem jenti adenshia garitem sota liasü. Parnoki garitemji yoktsü mela, ajisüaka gari nung alir meyong khutemji agizüker külen ang garitemji yok.
Osangbenertem den jembidang tetsürtem rongnung kati, rongsenkettsüng lenmang mokdangba tembangba sülen ang item khuji kibur tejangja nem agütsütsü, ta ashi.
Tetsürtem jagisa, “Shingaia onok dang mejashitsüla, kechiyong onoki mapatong ya kin mesüra lokti shinga anema masü. Onok tangatetbaji tejangja. Onok lendenlen aliba nüburtem nem kecha magütsür, asünungji tenemlen alirtemia iba timtemji ajangshitsüla,” ta metetdaktsü.
Checking point tem nung police malibaji tejangja aser police tiyongtsü ia inyakba osang kecha mali.
Ano külen state sorkari tang tashi sepaitemi truck tem meintsü atema sangdonga mali. National highway ana nung khu abenba truck aika anendena lir, aser item gari nung bena aliba khu aika shidokdar.
State assembly-i agizükba bill asem anema tribal tentet kari June 9 ayaterm nungi tenzüka anogo 10 nü rongsenketsüng lenmang mokdanga lir.