Manipur rongsenkettsüng nokdanger; Truck gari 2 rongtok

Imphal, December 04 (Agencies): Tang Manipur nung rongsenkettsüng lenmang nokdangba ajanga Manipur den sentaktepba lenmangtem nung khu/osettsüset abenba garitem 700 shi anendena lir, aser ibaji ajanga nüngdakba osettsüset aser chiyungtsütem nung jenjang kanga tuogo.
Jiribam district balaka atema takhangba agüja Jiribam District Demand Committee (JDDC)-i Bodhbarnü nungi ayonga mapang telatet ka makai rongsenkettsüng lenmangtem nokdangdar.
Ano Sadar Hills nung civil society organisation temi (CSOs) Senapati district nung Trans Asian Highway No 1 mokdanga highway yanglutsü akhangba ajanga Manipur leni osettsüset belenba nung timtem adokogo. Iba nokdangba ajanga khu bena aliba gari 100 shi Senapati district, Hengbung Taxation Check Post nung anendena lir, ta police ketdangser kati ashi.
CSOs-i ayongba sentong ya taoba November 17 nü tenzüka liasü, aser tesüiba anogo 3-4 tsüngda lungkak aitetertemi tang tesashiba lungkak aitdagi.
JDDC pusemertem ta temulung melemi bilemertemi Brihostibarnü Tamenlong district nung Leingangpokpi yim anasa NH 37 nung khu bena aliba truck ana rongtoktsüogo, ta ketdangserisa ashi.
Aonung 7:30 ako meta Silchar nungi Imphal-i aoba truck ana lungkak aitertemi rongtoktsüogo. Truck anaji Leingangpokpi anasa anendena aliba truck 600 shi nungji densema liasü, ta paisa ashi.
Rongsenkettsüng lenmang nokdangba ajanga tesüiba anogo ana tashi khu abenba garitemi state yimtiba metongteti lir.
Petrol totzü station tem nung petrol aser diesel alitsü atema nisung jenti tarensena noktakteper aser aonsotsü nunga jenjang kanga tuogo, ta idakji alirtemi ashi.
Ano külen Mission Blind School, Heikakpokpi kaketshir telongjemia parnok school full-fledged institute ka atema takhangba agüja state sorkar anema December 16 ayaterm nungi mapang telatet ka makai Imphal-Moreh lenmang nokdangtsü, ta sangdongogo.