Manipur: Sanjit tetsüi CBI-i ano bushisüngdangtsü akhanger

Imphal, January 29 (Agencies): Police tongti ketdangser ka tetuyuba nung taoba mapang telungpur, Chungkham Sanjit kahset ta tai tonglokja aliba ken o nung asür tetsüi CBI-i iba ken o ano tanaben bushisüngdangtsü takhangba ka agütsüogo, ta Hokolbarnü asür kinüngertem dang nungi osang ka angazüker.
Tawa Police Head Constable, Thounaojam Herojit-i, 2009 küm pai prangpong mebeni alisang Sanjit dak tekolak nung akah, ta ashiba nung ajemdaker Brihostibar aonung tesü Sanjit tetsü, Chungkham Taratombi-i Central Bureau of Investigation (CBI) dangi temepishiba ken o ka benokogo.
“Iba tatalokba anogo nung ozü jabaso tebu nem mozü alitsütsü atema jilai ao. Ajisüaka ghonda ishika lir kü dang, kahtepba mapang pa kahsetogo ta metetdaktsü,” ta Taratombi-i ashi.
Telungpur telok toktsür alisang Sanjit ya 2009 küm July 23 nü Imphal, B.T Road nung aliba mozü dokan ka nung shibanga ayu. Minute ishika tsüngda police kati pa tasümang atsütet.
Police-i hand gun ka sayua, iba prangpongji Sanjit ket nung bena liasü, ta ashi.
Osang ajanga ashiba agi, union Home Minister Rajnath Singh aser Minister of State for Home Kiren Rijiju nati nangzükba nung ajemdaker CBI-i iba ken o tanaben bushisüngdangtsü akok.
Ajisüaka ‘confessional statement’ nung tenüng agüja alir ketdangsertem dang tang tashi nungbo asüngdangyaa mali.
Imphal West district police superintendent, Akoijam Jhalajit tetuyuba nung Sanjit kahset ta tai tonglokja lir ajisüaka paibo, pa anema tai tongloktsübaji, otsü yangluba dang aser tamendakdak kuli maka, ta shiogo.