Manipur, Sikkim dak alaka NE state ajak nung tetsür police ajema lir

Shillong, Feb. 26 (Agencies): Northeast nung Manipur aser Sikkim state na dak alaka state trok- Assam, Nagaland, Meghalaya, Tripura, Arunachal aser Mizoram state tem nungbo pei pei state sasep police nung teburtem dang nungi tetsürtem kanga agi tajemba lir, ta police force nung gender equality indang report ka ajanga ashi.
“Tetsür police Assam nungsa tajemba lir, aser iba state nung tetsür police ji shilem ka dang lir. Assam nung police 55,033 nungi tetsür police 510 dang lir, aser ibaji shilem 0.93 shi dang asütsü,” ta Shillong nung ‘Rough Road to Equality’-i sangdong ka ajanga ashi.
Iba osang ya Meghalaya Police-i bendena liasü aser police force nung tetsürtemi tongtibang shilem agiba angatettsü merangtsü atema Common Wealth Human Rights Initiatives-i commission asü.
2014 January ita tashi nung Nagaland nung tetsür police shilem 1.05 aser Meghalaya nung shilem 2.87 liasüa, ajisüaka 2015 küm Meghalaya nung tetsür police 160 shimokba sülen shilem 3.99 aküm, ta kasa osang ajanga ashi.
Nagaland nung police 24,030 nungi tetsür police 253 dang liasü aser Meghalaya nung police 11,500 nungi tetsür police 489 liasü.
Ano Tripura nunga police 23,610 nungi tetsür police 777 dang liasü. Ano külen Mizoram aser Arunachal Pradesh na nungbo tetsür police shilem 5 agi timba kümogo.
Arunachal nung police 11,247 nungi tetsür 582 aser Mizoram nung police 9,895 nung tetsür 568 liasü.
Item state ajunga ya national average- shilem 6.11 tekübok lir.
Sikkim nung police 4,281 nungi tetsür 333 aser Manipur nung police 24,832 nungi testür 2,040 lir.
Ano Chandigarh ama state nungbo tetsür police shilem 15 jungnüa lir, aser Tamil Nadu, Andaman & Nicobar Islands, Himachal Pradesh aser Maharastra state tem nung tetsür police shilem 10 dak tema lir, ta kasa osang ajanga ashi.