Manipur sorkar mapa inyakertemi CM-i ashiba magizüker

Imphal, Rongchii (April) 27 (Agencies): Manipur Chief Minister N. Biren Singh-i 7th Pay Commission mapa küma tenzüktsü atema telatetba kar metetdaktsü saka ibaji Manipur nung sorkar mapa inyaker 100,000 aser pensioner 40,000 dak temai magizük.
Yangtepnü (Brihostibar) Forest aser Economics & Statistics department tem nung mapa inyakertemi mapai mao lungkak aitba sentong ka agi.
“Sorkari iba mapa inyaktsü atema committee ka shimtsüba telatetbatemji sorkar mapa inyaker aser pensioner temi magizüker” ta nisung kati ashi.
Taoba hopta Bharatiya Janata Party (BJP) office nung party sentong ka alidang Biren Singh-i “Sorkari 7th Pay Commission mapa küma tenzüktsü atemabo agizükogo” ta ashi.
“Ajisüaka, iba mapa inyaktsü atema Manipur-i küm shia sen crore 1,600 talila magütsütettsü, anungji luden kati teinyaktsütem jungjunga shisadangtsü” ta paisa shisem.
“Iba mapa atema luden ka shimogo, aser ibaji mapang atsülangba inyakyim ka dang lir” ta Joint Action Committee Secretary, L. Biken-i osangbener dang ashi.
Sorkar mapa inyakertemi mapaibo mapang shitak nung arur saka mapa inyaktsü memulunger ta ketdangser katia osangbener dang ashi.