Manipur sorkari coronavirus anema mapa inyaker

Imphal, March 6 (Agencies): Manipur sorkari state nung coronavirus tensa jungjunga tenük yokdar, ta Chief Minister N Biren Singh-i osangbener dang ashi.
Nisungtemi coronavirus atema maoksatsüla aser iba virus noktangtsü atema pei sasa teinyaktsütem inyaktsüla. Teti teka metsüktsüla, mask asemtsüla, teloktenjii kanga maotsüla aser aketdang tebang nembangtsüla, ta pai ashi.
January 18, 2020 nungi sorkari coronavirus anema mapa inyaktsü tenzük aser tang tashi nung iba virus aketer ka dang mali, ta Biren-i ashi.
Imphal International Airport aser Moreh, Behiang, Sinzawl, Tusom, Kamjong, Mao gate, Jiribam tesemtem nung aliba surface points nung nisung 1,21,629 tashi screen süogo, ta paisa shisem.
“Sample 12 tashi laboratory testing atema yok aser item nungi sample 10 negative ta nguogo aser ana indang osang ano mangu lir. Maneni, nisung 352 surveillance nung yua lir” ta paisa metetdaktsü.
Regional Institute of Medical Sciences (RIMS) hospital nung yipden 8 den ventilators 4 aliba Isolation wards lapokogo aser kasa isolation ward JNIMS hospital nung lapokogo, ta chief minister-isa metetdaktsü.
Iba atema 24×7 control room ka den toll-free number 0385-2411668 lapokogo, ta Biren-isa ashi.
Iba osangbener senden nung Manipur state chief secretary J Suresh Babu aser Director (Health Services) dena tongti ketdangsertem aika aden.