Manipur sorkari NSF teloki akangbaji inyaktsütsü nangzük, NSF teloki tezüluba nung meshir, longkak ait manentsü

Kohima, Feb 25 (TYO) : Imphal nung February 14 nü Manipur policetem kari NSF lenirtem mezüngmeshia amshiba anema tang NSF teloki Nagaland ajanga Manipur gari kata mejajadaktsüi sota lir, aser iba longkak aitba sentong ya Manipur sorkar-i NSF teloki akangba onüktem mataloktsü tashi maneni aotsü ta NSF lenirtemi metetdaktsüogo.
Tanü Brehostibar nü iba tebilemtsü ken o tongtepa jembitsü asoshi NSF dangi Manipur sorkari Special Investigation Committee nung Investigation Officer, DIG I.K.Muivah yok aser pai NSF lenirtemtem NSF office nung ajurua liasü. Special Investigation Committee ya Manipur sorkari February 14 nü atalokba indang bushisüngdangtsü asoshi shimtetba luden lir.
Tanü Manipur sorkari yokba ketdangseri NSF tir Wb. Subenthung Kithan aser pa den külem NSF lenirtem den jembidang, Imphal nung February 14 nü NSF lenirtem dak atalokba indang bushisüngdangtsü asoshi Manipur sorkari Special Investigation Team shimogo aser iba team jagi kanga junga bushisüngdanger NSF teloki akangba amaji inyaktsü, anungji tang Manipur gari mejajadaktsüi sota ayubaji chioktsü atema mepishia metetdaktsü.
Ajisüaka, iba tenangzükbaji tezüluba nung magütsütet nungji, tebang o kija jagibo meperir, anungji longkak aitba sentong ya maneni aotsü ta iba osangbener den jembidang, NSF tiri metetdaktsü.
“Tanü agi anogo anabuba Naga nunger lushi ajanga Manipur gari kata mesenzüdaktsüi nokdang lir aser kechalena lendong timtem atalokba osang mali, ,” ta NSF tir Wb.Kithan-isa metetdaktsü.